2026 жылдың 12 ақпанында туризм және экологиялық ағарту бөлімі қызметкерлері ғылыми бөліммен бірлесіп, Жаңаауыл мектебінің оқушыларына «Ертіс орманы» МОТР табиғаты мен биоәртүрлілігі туралы танымдық дәріс өткізді. Оқушылар қарағай орманның экожүйедегі рөлі, оның климатқа және адам денсаулығына маңызы туралы білді. Кәдімгі қарағай – өңіріміздің ормандарының символы.Ол 400 жылға дейін өмір сүреді, ауаны тазартады, фитонцидтер бөледі және экологиялық тепе-теңдікті сақтауға ықпал етеді. Сонымен қатар, оқушыларға Қазақстан Республикасының Қызыл кітабына енгізілген сирек кездесетін өсімдіктер мен жануарлар туралы айтылды.Олардың қатарында орман сусары, бүркіт, ителгі, дала қыраны және басқа түрлер бар. Кездесудің басты мақсаты – жас ұрпақтың табиғатқа деген жанашырлық көзқарасын қалыптастыру және орман мен оның тіршілік иелерін сақтау әрқайсымызға байланысты екенін түсіндіру.
