«Ертіс орманы» резерваты мен Қазақ орман шаруашылығы ғылыми-зерттеу институтының арасындағы келісімшартқа сәйкес, мемлекеттік орман табиғи резерваты «Ертіс орманы» аумағында орман дақылдарының өсіп-жетілуін арттыру мақсатында ғылыми-зерттеу жұмыстары жүргізілуде.
Зерттеу аясында келесі жұмыстар атқарылуда:
— топырақтың ылғалдылығы мен химиялық құрамын анықтау үшін сынамалар алынуда;
— дендрохронологиялық зерттеулер жүргізу мақсатында жақын маңда табиғи өскен қарағайлардан керн үлгілері алынуда;
— ауаның орташа температурасы сияқты климаттық көрсеткіштер зерттелуде.
Зерттеудің басты мақсаты – отырғызылған орман дақылдарының жерсінуін арттыруға әсер ететін негізгі факторларды анықтап, ғылыми негізделген ұсыныстар әзірлеу.
